நிறுவனம்:மாத்தளை முத்துமாரியம்மன் கோயில்
| பெயர் | மாத்தளை முத்துமாரியம்மன் கோயில் |
| வகை | இந்து ஆலயங்கள் |
| நாடு | இலங்கை |
| மாவட்டம் | மாத்தளை |
| ஊர் | மாத்தளை |
| முகவரி | பிரதான வீதி, மாத்தளை |
| தொலைபேசி | |
| மின்னஞ்சல் | |
| வலைத்தளம் |
மாத்தளை அருள்மிகு ஶ்ரீ முத்துமாரியம்மன் கோயில் இலங்கையின் மத்திய மாகாணத்தின் மாத்தளை மாவட்டத்தில் மாத்தளை நகர மத்தியில் அமைந்துள்ளது.இலங்கையில் ஐந்து இரதங்களைக் கொண்டுள்ள ஆலயம் என்ற சிறப்பிற்குரியது. இக்கோயிலின் 108 அடி உயரமான இராஜகோபுரமே இலங்கையின் மிக உயரமான இராஜகோபுரமாகவும் அமைந்துள்ளது.
இவ்வாலயத்தில் ஆரம்பத்தில் நித்திய பூஜைகள் மட்டுமே நடைபெற்று வந்துள்ளன. பின்னர், படிப்படியாக திருவிழாக்களும் சப்பறத்தேர் இழுக்கும் வழக்கமும் தோன்றின. 1934 ஆம் ஆண்டளவில் சப்பறத்தை மாற்றி விநாயகர், சிவனம்பாள், முருகன் ஆகிய மூர்திகளுக்கான இரதோற்சவம் நடைபெற்றன. இவ்வாலயத்தில் கொடியேற்றத்தை அடுத்து 21 நாட்கள் திருவிழா நடைபெறும். இரதோற்சவம் அன்று முருகன், சிவன் - அம்பாள், ஸ்ரீ கணேசன், சண்டேஸ்வர் மற்றும் மாரியம்மன் ஆகிய மூர்த்திகளின் இரத பவனி இடம்பெறும்.
1955 ஆம் ஆண்டு இராஜகோபுரம் உட்பட பல ஆலய அபிவிருத்தி நடவடிக்கைகள் மேற்கொள்ளப்பட்டன. பொதுமக்களின் ஒத்துழைப்புடன் ஆலயத்தில் மகா மண்டபம் உட்பட முருகன் கோயில், வசந்த மண்டபம், விஷ்ணு கோயில், நாயன்மார் கோயில், மீனாட்சி, சிவன் கோயில் என்பன திருப்பணி செய்யப்பட்டன.
1977 ஆம் ஆண்டு அம்பாளுக்கு சித்திரத்தேர் அமைக்கப்பட்டு வெள்ளோட்டம் விடப்பட்டது. 1983 ஆம் ஆண்டு இனக்கலவரத்தின் போது இச்சித்திரத்தேரும் ஏனைய இரதங்களும் எரியூட்டப்பட்டதுடன் கல்யாண மண்டபம் உட்பட பல பகுதிகள் சேதமாக்கப்பட்டு பேரழிவுகள் ஏற்படுத்தப்பட்டது. 1992 ஆம் ஆண்டில் சித்திரத் தேரையும் ஏனைய இரதங்களையும் அமைக்கும் திருப்பணி ஆரம்பிக்கப்பட்டு வெற்றிகரமாக நிறைவேற்றப்பட்டதோடு வருடம்தோரும் இரதபவனி வெகு சிறப்பாக நடைபெறுகின்றது.
